政情：立春開聯合議辦 林素蔚負傷出席

林素蔚日前出席「A4」聯盟傳媒茶敍時遲大到，事關大年初八嗰日佢喺屋企浴室跣倒，撞傷背脊位置，初時以為無大礙，誰知其後痛楚加劇，連帶頸及頭部都痛，依家要接受針灸治療，飲食要戒口。新正頭就遇上家居意外，佢笑言自己應該係「犯太歲」。

不過，林素蔚都有堅持出席議辦開幕，佢提到自己喺將軍澳成長、生活二十載，畢業後亦以社工身份服務將軍澳。在基層及勞工服務上，與林振昇有一致想法，亦就職專教育與林互相交流和合作，兩人一拍即合，聯手開設地區辦事處。

林振昇亦分享與林素蔚早有淵源，事緣佢居住當區嘅巴士線被取消，經林素蔚與當區協調後，該巴士線得以保留；又指林素蔚非常勤力，區內大小事務都親力親為，所以當林素蔚建議開設聯合辦事處，佢即刻答應同支持。林振昇冀日後利用工會服務，例如家居電器檢查、再培訓課程及就業轉介等，服務將軍澳居民，令社區變得更好。