政情：促檢討疫情被拒 狄志遠加緊游說

內會主席引述政務司司長嘅回覆，指政府今年擬向立法會提交34項草案，但會因應社會需要，於年中更新各議程嘅立法時間表。狄志遠發言時就再次關注當局會否成立獨立調查委員會檢討疫情，又強調坊間有聲音要求就疫情作檢討工作，對於政府一再拒絕成立委員會感到失望，希望內會主席與當局溝通。內會主席話明白議員對公共政策嘅關注，但內會涉及整體立法會事務，並非就某項目表達睇法，但秘書會照樣紀錄狄嘅訴求。

狄志遠喺會後表示，希望政府切勿敷衍，應就檢討疫情嘅訴求作出交代。雖然佢加緊游說議員同事支持檢討疫情，不過建制派嘅反應都小心翼翼喎。佢直言「唔檢討好難交代，個個專家都話要做嘢」，盼最終能夠就老人院、醫務等範疇作檢討。