政情：醫管局「見字不見人」 區議員心寒

李偉峰指醫管局就疫情嘅書面回覆，儘管今次較過往3年多，但始終未完全解答得晒，尤其是局方所提供嘅數據，只係截至今年1月15日前，而非截至本周。而區內兩間醫院其實已經「爆咗煲」，即伊利沙伯醫院及廣華醫院急症室嘅內科病床，喺今年1月頭15日嘅平均住用率分別為116%及94%，數據未能全面反映通關後情況。

至於油尖旺區公立醫院急症室及床位，本地人及非本地居民嘅使用比例，局方都係無答；非本地居民使用醫療服務後「走數」嘅應對措施，亦都無提。油尖旺區議會秘書處喺會上就話有問過醫管局，對方指未能派員出席會議，請區議員見諒。但明白到大家關心通關後情況，因此提供書面回覆供區議員參考。

而醫管局早前喺書面回覆指，今年1月1日至15日，九龍中醫院聯網急症室整體嘅運作情況大致穩定，伊利沙伯醫院及廣華醫院急症室首次求診人次分別為6,298及3,796，當中有4,733名病人經急症室入院；截至1月15日，醫管局已為超過27.2萬名病人處方兩款新冠口服藥物，包括超過8.7萬人獲處方莫納皮拉韋及約18.5萬人獲處方帕克斯洛維德。