政情：邵家輝驚失守 食飯也戴罩

尋日自由黨舉行新春團拜，一眾立法會議員、區議員濟濟一堂，身為主席嘅邵家輝喺用膳期間，臉龐仍為口罩所覆蓋，但見佢不時持筷子夾餸，扯低口罩送入口中，然後又將口罩拉番高，如是者周而復始，幾乎成餐飯都係咁。雖然咁做睇落係幾麻煩，但邵都甘之如飴，佢解釋話自己同屋企人，包括太太及小朋友至今都未確診，為謹慎起見，自己在外應酬，都係保持警覺，小心為妙，以免家人受影響咁話。

同場嘅仲有灣仔區議會副主席林偉文，而佢都係謹慎一族，喺專家呼籲撤銷口罩令時，佢都堅持戴兩個口罩，理由同邵都係一樣，皆因全家人到依家都未曾中招，惟有繼續「嚴謹」防疫。