政情：新田購物城執笠 象哥任內最大遺憾

退下火線嘅象哥至今對新田購物城仍然念念不忘，佢早前接受訪問就話，新田購物城開業後，香港形勢唔同咗，「自由行取消咗，亦都係出現一啲所謂『驅蝗行動』呀、『踢喼』呀嗰啲咁嘅嘢，令邊境購物城呢個設想被冷淡。」令購物城出現嚴重虧損，被迫關閉。象哥仲形容「呢件事係我17年立法會議員生涯裏面，非常遺憾嘅事。」

其實位於落馬洲邊境嘅新田購物城，係象哥任內一手一腳推動嘅項目，計劃從籌劃到建成已花咗兩年半時間，喺2018年2月初試業，原本計劃吸引內地來港嘅旅客光顧購物，不過一直被指人流稀少，購物城最終喺2021年8月30日結業，亦有報道話呢個地皮可能會用嚟建屋。