政情：議員質疑 氣象監測站未起 貴價買超級設備

政府計劃在新界西北尖鼻咀興建一個「粵港澳大灣區空氣質素實驗室和氣象監測超級站」，預計佔地1,150平方米，於2027年全面運行，而預計為超級站購置一系列先進空氣質素監測設備、溫室氣體監測等設備嘅開支為1.41億元，購置高效能電腦嘅開支為1.2億元，所需總承擔總額為2.61億元，當局表示將放在財政預算案內審批。而涉及興建超級站大樓嘅工程前期性研究撥款，會再按程序向立法會申請撥款。

不過，現時已經有18區分區氣象站，加上有4個分區氣象站已參與大灣區氣象監測，議員郭偉强問到，香港地方細小，測量數據分別應該唔大，有無話起幾多個先夠，又問尖鼻咀係咪最後一個監測站。而香港市民最關心是打風落雨嘅監測能力，新設備有咩幫助？

當局回應指，天氣變化太快，加上氣候改變令極端天氣愈來愈多，天文台難以量化高性能設備嘅效用，但希望可以提早預報時間，例如提前在雷暴未發生前警告，又希望虛報率少啲。又指喺「呢個時空」尖鼻咀係最後一個，相信將來再要興建新站嘅機會唔大。

此外，政府未建大樓就先買設備同電腦，多名議員唔了解有關做法，追問購買超級電腦嘅迫切性。其中議員謝偉銓質疑到時拎咗錢，電腦買完擺咗喺度。委員會主席葛珮帆亦指，電腦幾年就一代，擔心買來嘅電腦會被淘汰。就此當局就指，購買超級電腦由制訂標書到採購送貨，整個過程需時，又舉例現時天文台使用嘅電腦喺2018至2019年度購入，但今年才到貨，強調唔會買咗喺度等。