政情：揮春不求寫得靚 梁熙：錯字先最驚

寫慣仲有壓力？梁熙尋日出席一個活動時話，因為議員前輩嘅墨寶寫得特別靚，可能驚「珠玉在前」，咪話自己特別大壓力囉！不過，佢話「不求寫得靚」，「只求唔好寫錯字」，只要大家唔覺得佢畫緊符就得啦！

話明係兔年，揮春就唔少得寫個「兔」字，梁熙就話寫兔字要留意一點，如果冇咗點就會變成「免」字。之不過，佢話免字都幾好㗎，因為意味住「免核酸檢測」同「免疫力好」咁話喎。

尋日就適逢梁熙所屬政黨嘅團拜，期間佢哋就話會成立工商專業支部，預計就會喺政黨換屆，即係大概4月嘅時候完成，因為話換屆就會有「改革」，梁熙都話成立咗工商專業支部之後，就唔會好似以前咁分散負責，未來對於工業同商界事務就會有一組人專門負責咁話喎。