政情：梁志祥趁通關即回鄉

退下火線之後甚少喺公眾場合露面嘅前議員梁志祥亦有出席活動，佢話中港兩地最近恢復有序通關，已趁農曆新年假期返咗一轉鄉下廣東清遠啦。佢話當地嘅疫情唔係好嚴重，交通亦都非常暢順！

離島區議會主席余漢坤都在場，但佢嘅太太、即劉業強細妹劉玉蓮以及3個仔女都冇出席。余笑言，太太同3個小朋友去咗打高爾夫球。佢話疫情3年，多咗時間陪伴妻小；但隨住社會復常，各項活動陸續舉行，日常難免要忙於應酬，同家人共聚嘅時間恐怕大減。

出席活動嘅仲有鄉議局副主席莫錦貴及其千金莫熹雯、議員陳克勤、陳恒鑌、葛珮帆以及九龍樂善堂常務總理李聖潑等人。陳恒鑌更同眾人大玩自拍，另外佢早前促請政府盡快重開露營地點，自己亦喺新年期間同家人到大嶼山露營，不過適逢大年初三、初四，氣溫驟降，寒冷難耐咁話。