政情：劉智鵬談四邑 憶父母結合

所謂四邑，係指江門市下轄嘅新會、台山、開平同恩平。劉智鵬話十九世紀中期，四邑地區嘅本地人同客家人發生好多爭執，後來惡化為大規模嘅群體打鬥，甚至乎出動兵器。而「土客械鬥」嘅結果，就令到好多當地人開始向南移民，最終嚟到香港定居，所以，有唔少香港居民係四邑人士。另一方面，昔日有四邑人士見生存不易，離鄉別井到美洲或者澳洲打工謀生，即俗稱嘅「賣豬仔」；亦有人透過「門路」，經過親戚朋友、家人一代一代咁移民，因此四邑又有「僑鄉」之稱。

劉智鵬話佢之所以要講江門同四邑，因為佢嘅媽媽係江門市人，而爸爸就係潮州人。父母嘅家鄉喺地理上雖一東一西，然而歷史在波動，人口在流動，造就跨越地域嘅姻親，結為夫婦。