政情：陸頌雄梁子穎畀意見 搶人才眼光不宜短淺

梁子穎指政府鼓吹港青要到大灣區發展，但好多人都擔心就業機會同薪水問題；對於年紀較大嘅港人而言，北上定居並非移民，於是其強積金戶口就好似「無靈魂」咁，既不能提取以應付內地嘅生活開支，但又要時刻睇住。所以，梁子穎建議優化福利，以及強化強積金退休保障功能，甚至為香港市民考慮埋社保、醫保等社會保障。

至於人才計劃，兩位議員都認為，政府過往將焦點擺喺歐美國家，但其實仲有好多地方都有人才。譬如中東、東南亞等地區都係人才庫。講起中東，特首下月將出訪當地，而兩位議員所屬嘅政黨，就暫時未受到隨團出訪嘅邀請。不過陸頌雄就話政府成立嘅「推廣香港新優勢專責小組」，冀日後可以加多啲勞工代表，令外國知道香港人工作質素，同埋良好嘅勞資關係。

此外，會計界議員黃俊碩將聯同工聯會職業再訓練就業輔導中心舉辦會計業招聘。梁子穎話一直有同對方所屬政黨合作，今次搞招聘會嘅想法一拍即合，嚟緊同其他議員都可能搞招聘會，包括創科界嘅邱達根。