政情：家傳騎呢工藝品 洪雯：回憶勝價值

其實呢啲「奇醜」嘅舊物，有部分係洪雯細個時見過。譬如有一個小花瓶，依附旁邊嘅晚清婦人站姿「騎呢」，眼神憂鬱、鼻孔突兀；仲有一尊白白胖胖嘅陶瓷佛像，眉眼極粗糙，嘴巴造型似笑非笑，一睇就知係民間拙劣嘅工藝品。洪雯問佢爸爸有關老物件嘅來歷，原來係爺爺奶奶遺留嘅小擺設，應該係佢哋結婚時用嘅，怕且都有80、90年歷史啦！

洪雯又見番一個相當心儀嘅銅扣漆面小盒，不禁憶起一段童年往事。原來小盒係佢父母用嚟放戶口本、存摺嘅，以為收埋喺櫃桶可妥善存放，殊不知當年人細鬼大嘅洪雯，會靜雞雞咁去偷睇以滿足好奇心，然而與之相配嘅銅鎖依家就唔見咗，佢大感可惜。佢話老物件未必有乜嘢審美或金錢價值，但勝在有歷史、有市井氣同埋有先輩嘅記憶。