政情：借錢唔還 苦主發難 齊轟張秀賢慣犯

渾水話大年初三赤口日約咗一班好友聚會，席間大家為免傷和氣，於是分享一位「共同相知」嘅是非。渾水形容呢個人「是一位社會知名人士，鎂光燈外，是很著名借錢不還的債仔。……此君以前是做政治的，近年轉趨低調。」而且佢嘅「借錢網絡」龐大，「左中右都有，身邊的朋友借到盡，以前做議員的義工、助理和街坊都借到盡，舊同學莊員也下手」，借錢藉口都好多，「例如選舉開支，借錢應急周轉，自己撞車，家人撞車，要去台灣發展水果事業」等等。渾水話自己都借過錢畀佢，又「自責」話判斷失準、道行不夠，唔怪人咁話。

之不過，該「債仔」近排胡亂吹噓，話能夠搭路見身兼行政會議召集人嘅議員葉劉淑儀，做法就令到渾水相當不齒，仲用嬲嬲表情示意添！畢竟同葉劉熟絡嘅話，渾水勝過呢位「債仔」多多聲，事關渾水曾經公開喺節目上贈送小菊花畀葉劉，而葉劉都送番本雜誌回禮。好彩葉劉回覆傳媒查詢有關涉事人物，形容「我同佢唔係好熟」、淨係見過兩次左右，對其個人事務唔清楚。

雖然渾水唔肯開名，只係叫大家自由心證、各自猜想，但係有人就幫佢畀答案喎，目前身在外地嘅童裝品牌老闆周小龍就喺貼文留言話「其實係人都知係張秀賢」，咁張秀賢究竟係邊個呢？原來佢係前元朗區議員、前香港中文大學學生會會長。而網上都有唔少討論區聲討佢借錢唔還，而張嘅選區居民就控訴佢「不停問班義工團隊以各種名目借錢，東借一忽西借一忽，集腋成裘」。

正所謂一石激起千重浪，涉事人物嘅身份昭然若揭，但渾水都堅持話唔開名，話要留對方一啲面子。佢又透露公開貼文之後，「債仔」就主動搵番佢，雖然成個溝通過程都聽唔到一句道歉，但都有提出一個還款方案。渾水就嫌態度唔係咁好，但都唔想「逼死他」咁話喎。