昔日東方政情：東鐵綫幕門冇下文 田北辰火滾
作為乘客，如果一唔小心差錯腳跌入路軌，分分鐘出意外。而日前一名老翁不適頭暈失去平衡，意外喺港鐵東鐵綫太和站往上水方向月台墮軌，好彩喺消防人員協助下，被帶離路軌範圍，並送院治理。之不過，事故引起議員田北辰關注，佢指由沙中綫通車到依家已經8個月，但東鐵綫幕門一個都未起好，質問港鐵咁嘅效率，點叫做將乘客安全放喺第一位？
田北辰先提到東鐵綫幕門歷史，佢指相關議題由上世紀追起，由於幕門要對位，所以舊時12卡車時安裝唔到。但佢提到幕門預備工作，包括鞏固月台、9卡車停車位置都標記好晒，而據佢理解，前期工作已經做到差唔多，並唔係喺沙中綫通車之後先至由零開始，跟住落嚟嘅工作只係每個站去裝番個幕門。
「竟一個月台都未裝好」
佢好困惑裝好晒幕門冇理由要成3年咁耐，18個月都已經足夠，但港鐵一直講唔到延誤原因。佢提到幕門一日未裝好就等於一個隨時引爆嘅計時炸彈，唔擔保下次唔會出現嚴重傷亡，而沙中綫通車到依家8個月竟然一個月台都未做好，絕對係不可接受。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
