政情：重遊宿霧 江玉歡嘆慘不忍睹

Doreen話因為鍾意陽光與海灘，所以以前經常去宿霧。事隔3年後，佢近日重遊舊地，話感受良多。究竟發生乜嘢事？佢尋日喺社交平台貼文，話無論係Mactan島同Cebu市內到處都見到用鋅鐵同木搭建嘅貧民區，咪以為Mactan係旅遊區會好啲，實際上都係延綿不絕嘅木屋區，衞生情況慘不忍睹。

雖則Cebu市內最豪華嘅商場亦見到有好多名店，市內亦有第一間米芝蓮食店，但佢話高檔公寓十室九空，高尚商業區同木屋區為鄰，佢覺得好諷刺，而全市最旺嘅竟然係Mactan島上嘅午夜露天disco，嗰度成為當地年輕人嘅蒲點，周圍都見到酒醉青年。

佢話3年後見到宿霧嘅滿目瘡痍，由於嗰度係菲律賓第2大城市，人均生產總值每月只有1,200港元，疫情對呢個第2大城市同嗰度嘅旅遊業衝擊有如巨浪。睇到其他城市嘅發展同問題，佢話有唔少啟發，認為天災固然無情，但人係可以改寫命運。佢話疫後政府資源有限，點樣投放，先挽救邊啲人，先後緩急稍有差池，對復甦有影響。