要聞港聞

派糖紓困使乜諗 還富於民行大運

剛踏入兔年,相信大家呢幾日聽得最多嘅,都係「恭喜發財」、「身體健康」、「新年行大運」!點止祝賀說話咁簡單,經歷疫慌、經濟低迷,發財同健康早已成為香港人最迫切嘅願望。隨住疫情退去、恢復通關,市民終於見到曙光;喺呢個關鍵時刻,港府好應該加一把勁,推動社會全面復甦,派糖自然係不二之選!
新一份財政預算案即將喺下個月出爐,市民最關心嘅莫過於港府派唔派糖,大唔大粒,抑或係小恩小惠、到喉唔到肺。近日各界紛紛發表意見,當中最矚目嘅,當然係建議港府繼續派發消費券啦!殊不知喺尋日大年初一,本應該喜氣洋洋嘅日子,竟然有財金官員出嚟話,目前各政黨對於派唔派消費券嘅意見並不一致,有政黨擔心續派消費券會對政府財政造成太大壓力,認為要投資中長期,先可以令到經濟持續增長。官員言下之意,查實即係話呼聲再高都唔一定成事,今年未必會派消費券囉!
新年流流,忽然聽到官員說法,相信唔少人都覺得難聽過粗口,開心即時減半,連拜年嗰陣都笑唔出!唔開心係好正常,皆因現時唔係百業興旺,派糖並唔係錦上添花、可有可無,而係雪中送炭;對於基層嚟講,甚至可以形容為救命稻草。就算派得唔多,舉例話派5,000元,只有去年一半都好,足以免去基層一個月使費嘅煩惱;家吓話有機會唔派,基層失望之餘,仲要早作打算,例如話開年飯食平啲,利是都派少啲咁,提前儲多一蚊得一蚊,過年又點會開心?
呢嗱!並唔係話反對派消費券嘅政黨想法唔啱,現時港府財赤嚴重,庫房五行缺水,係公認嘅事實;政黨嘅擔憂,當然有道理啦!之不過,就算明白有道理,但道理唔可以當飯食;況且現時經濟環境有幾差,民生有幾惡劣,幾多人失業、手停口停,一樣有目共睹。即使預期經濟將會復甦,明天會更好,優先考慮嘅,都係今日有冇飯開!唔係唔體諒政府財政儲備緊張,但多有多派、少有少派啫;好似包利是咁,有能力嘅可以封500元、1,000元,冇能力咪封10元囉。同一道理,消費券派少啲,市民唔會話太反感,但完全唔派,難免認為港府唔體恤市民。
雖則話派糖有好多種,唔派消費券,一樣可以有其他扶貧措施。問題係,歷屆政府所推出嘅扶貧措施,每每遭人詬病,遠不及派消費券,直接到市民手來得實際。更何況,消費券本身已經係折衷嘅方法,過程煩瑣又問題多多,派錢先係最好,純粹因為港府擔心市民收錢之後會儲起唔用,先改派消費券啫!既然港府認定派消費券有助於帶動消費,消費增加有利於經濟復甦,經濟復甦就會增加庫房收入,最終都係流番入庫房啫;還富於民,又有乜好怕喎!
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500