要聞港聞

長者司機響警號 的伯飛彈誰之過

法國日前發生全國跨行業大罷工,知唔知為乜?原來係企圖阻止總統馬克龍將合法退休年齡,從目前嘅62歲延遲到64歲!功夫茶內心不禁納悶:如果法國人民知道香港有耄耋之齡嘅老人家仲要揸的士搵食,唔知會唔會覺得自己嘅行為太過分?
各位,香港車多路窄,馬路如虎口,發生車禍好平常;今趟同大家討論一單的士意外。呢,日前19日晚上10點幾,一名87歲姓梁的士司機,駕駛的士沿告士打道往中環方向行駛,駛至華懋世紀廣場對開,撞到一輛私家車,惟佢未有察覺,繼續前行約140米,途經謝斐道,轉入杜老誌道,再撞及6輛電單車及一輛私家車。多名途人目睹意外經過,即時喝令佢停車,並報案求助;事件中,「的哥」冇受傷。
其實,年近九旬老翁揸的士,是否仲可稱之為「的哥」?應該係「的伯」名正言順啲,從上述可見,佢完全冇意識自己撞到其他車,仲要撞兩次涉及6部電單車及兩部私家車,畀途人目睹喝停先知道要「停車」!阿哥,佢完全冇感覺自己部的士撞到嘢,如此盲舂舂仲唔屬於「危駕」點先算係呢請問?
呢,咁都未算傳奇!原來涉事「的哥」喺上周四即12日下午4點幾,曾喺金鐘發生交通意外。佢當日駕駛的士沿夏愨道往中環行駛,至海富中心對開失控撞壆,繼而向右翻側。佢與姓葉嘅60歲女乘客被困車內,需由消防員救出,幸兩人僅受輕傷,由救護車送院檢查。各位,呢位「的伯」12日出事,19日又揸的士搵食出事,一星期內衰兩鑊!沿途驚險百出,如同玩命而自己竟然全不察覺,事情再次掀起「的哥」老齡化,長者司機安全響警號嘅問題!根據運輸署至去年12月31日嘅數字顯示,本港80至89歲嘅高齡司機有1,624人;90歲或以上亦有49人!
嗱!日本人口老化嚴重,出現「老人飛彈」呢個新詞,形容把加速當煞車,衝入人群造成車禍嘅老人家!今趟呢單可視為「的伯飛彈」,冇死人算好好彩,如果佢咁嘅駕駛態度仍然可以揸的士搵食,呢個反映申訴專員有見長者司機肇事頻仍而提出嘅建議又係「好好好,睇唔到」!申訴專員關注運輸署現時雖然建議醫生要70歲或以上駕駛執照申請人,填寫「體格檢驗證明書」時應進行體格檢查嘅範圍,之不過冇規定醫生喺事前必須為申請人進行任何指明嘅檢驗項目,認為有主動調查必要。好似呢位「的伯」,恐怕視力有嚴重問題,佢揸的士就如莊子筆下嘅「庖丁解牛」:以神遇而不以目視,官知止而神欲行!要杜絕「的伯飛彈」,有關當局真係要好好考慮年長職業司機發牌制度,否則,揸車憑感覺,成街「飛彈」,馬路如戰場,香港還是個安全、宜居城市嗎?
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500