政情：陸瀚民倡扣稅鼓勵生育

陸瀚民話曾經喺立法會質問民青局局長麥美娟，點解《青年發展藍圖》對鼓勵生育無咩着墨？畢竟生兒育女都係青年人對於未來嘅一個選項。但要鼓勵年輕夫婦生BB，陸瀚民話無可能要求政府直接支援，因為會對庫房構成好大壓力。然而外國為鼓勵國民生育，會提供一啲優惠如稅務寬減嘅做法，就值得香港借鑑。譬如添丁後所涉嘅開支若達到某個數額，就得享扣稅優惠，當然，可扣減嘅稅額唔能夠太少；又或者，生BB之後能夠獲發一封利是賀喜一下，咁做大家都開心吖，係值得政府思考嘅。

佢話目前香港人口結構邁向老齡化，出生率又陷於低谷，可以想像現時二、三十歲嘅青年人將來年屆退休之時，職場上嘅勞動力短絀之餘，社會老齡化嘅情況更加嚴重。陸瀚民強調政府唔單止要研究人口政策，仲要着眼於生育政策。