政情：樹擋人路 殺機滿途 陳月明向局方追數

陳月明話，坪輋路喺70-80年代落成，但一直欠缺維修。咁多年嚟路旁樹木茂盛生長並逐漸佔據行人路，搞到居民出行都唔方便。

事實上，喺2020年嘅時候，曾經有市民踩單車途經該路段，最後被小巴撞到，頭部重傷昏迷，送院不治。

其實陳月明都唔係第一次追數啦。佢話先後多次喺立法會見到運輸及物流局局長林世雄，都會趁機要求局方解決問題，及後林世雄就安排今次跨部門實地視察，不過負責該路段一帶樹木嘅康文署代表就冇嚟到。陳月明話前日有出席嘅部門代表話會溝通吓先，但如果都係冇結果，咁就要再搵林世雄啦。

之但係坪輋路可以點改善呢？陳月明話該路段可以接駁去香園圍、文錦渡、羅湖3個出入境口岸，恢復通關必定有交通擠塞問題，長遠而言需要增加行車線，短期就至少要清理路旁嘅樹木，開通番條路畀人行先啦，更反問「樹木緊要定人命緊要呢？」佢又話，雖則局方仲未有就改善道路訂下時間表，但就承諾咗會喺本月尾提出方案，預計到時雙方可以坐低再慢慢討論喇。