政情：東日街市難擋風雨 官員大安旨意

話說考慮到香港悶熱嘅氣候，東日街市喺設計上好着重自然通風，因此天幕距離地面較高。有區議員就擔心天幕同檔位頂部之間寬闊，一旦遇上橫風橫雨嘅惡劣天氣，雨水會撇入街市，咁就會趕客，冇人嚟。雖然有人提議加裝伸縮簷篷，但此舉又可能阻礙自然通風。而在場官員就話臨時街市唔係密封場所，冇可能滴水不漏，但可以做到大部分時間都唔受天雨嘅影響，咁如果遇到黑雨呢？佢話相信嗰陣大家都會盡快返屋企喎。

離島區議會主席余漢坤就打圓場咁話「自然嘅嘢」好難講，要等街市正式運作後，再睇吓有咩可以改善地方。在場嘅官員話東日街市嘅檔位面積，同天水圍天幕街市係一樣嘅，但通道會更加闊落，又話有鑑於檔販要招徠顧客，會容許貨物擺出檔位外嘅指定範圍，但收市就必須收番入檔位裏面。