政情：黃錦輝口誤 前廳交流會變交易會

本身係中大學者嘅黃錦輝，加入立法會冇耐，尋日亦係第一次參加立法會特首答問大會，會上問及當局有關知識產權及專利權，期間就提到「十四五」規劃十分支持香港成立區域知識產權貿易中心，喺日前嘅「前廳交易會」上亦有提到有關議題，口誤將「前廳交流會」講成「前廳交易會」。

至於佢關注知識產權中嘅專利權，牽涉科研成果轉移，而現時該工作由商務及經濟發展局負責，詢問當局會唔會將轉移工作轉交創新科技及工業局處理。不過，當局就話喺制訂公共政策上，一定會面對項目專業有重疊，甚至有空隙嘅地方，又舉例除科技，設計、文化等方面都有知識產權嘅問題，故制訂政策時會考慮邊個部門係關鍵，其他環環相扣，若無法「扣」到，就會出動司長、副司長領導各局，給予指示協調，認為呢個模式係最有效，當然亦可按實際情況作出調整。