政情：議員怨特首超時答問 問重啟政改又要等

話說尋日嘅特首答問大會為時90分鐘，當特首用咗約莫30分鐘發言後，可供議員發問嘅時間就得番60分鐘。若果每位議員連問連答係3分鐘，咁都可以有20位議員可以發問。點知實際情況係逾半嘅議員提問，特首用6分鐘回覆，以致成功發問嘅議員大減，而佢本來準備咗兩條問題，其一係有關重啟政改，結果都無法提出。被問及特首對答方式係咪有問題？狄志遠就話自己冇資格批評，不過超時作答的確會令發問人數減少。由於佢認為依家社會聚焦財政預算案，打算喺預算案公布後再提出有關重啟政改嘅議案，或會以議員議案嘅形式提出討論。

唔單止政改，屬於地區諮詢層次嘅區議會，狄志遠都相當關注今年11月嘅換屆選舉。儘管早前有消息指，區議會選舉唔會押後，然而政府至今仍未向公眾交代有關安排。於是近日佢就去信立法會政制事務委員會，要求討論區議會選舉進度及時間表，並敦促政府盡快交代，等政黨、組織可以作出選舉部署。

狄志遠話睇番2007年嘅《施政報告》，時任特首曾講過話要提升區議會職能，以改善地區工作，進一步推動地區行政發展。之不過事態嘅發展，前年政府要求全體區議員宣誓，繼而爆發辭職潮，導致現屆區議會479個議席中逾300懸空，多區只剩數名區議員，難以正常運作。雖然換屆選舉日漸逼近，但政府至今仍未就檢討區議會選舉進度及時間表向公眾交代，佢認為再係咁拖延落去，難免予人感到政府有意削弱本港嘅民主代議政制及地區行政。

其實立法會各事務委員會啱啱選舉出正副主席，當日狄志遠都有提及話想討論區議會嘅問題。佢話所屬政黨會派人出選，以往需要兩年時間準備選舉，但依家有冇得選都未知，咁就真係好難部署喇。至於關愛隊方面，佢話未打算參與，不過如果有人邀請，都唔排除會考慮嘅。