政情：議員關注旅業復常 港府話加碼推廣

葛珮帆亦留意到旅遊業重新聘請及培訓員工、全面檢驗同維修車輛及申請牌照等。議員何敬康就話香港居民於指定期間到訪澳門且逗留一晚或以上，可得澳門旅遊局推出嘅買一送一跨境交通票務優惠，反觀香港並無咁做，詢問當局會否倣效。

文化體育及旅遊局局長楊潤雄回應話港府反對無理針對香港嘅入境措施，當局正與相關領事館交涉，要求全面撤銷帶歧視性嘅限制，並闡述本港最新防疫安排，冀相關國家重新檢視措施，並強調任何防疫措施都必須根據科學事實。佢承認現時入境旅客數字同疫情前仍有好大距離，但當局同旅發局已加強宣傳推廣，安排更多內地同海外旅遊業界、媒體等來港，以感受香港全新旅遊景點；旅發局亦計劃為訪港旅客送出特色歡迎飲品、購物券等，以吸引佢哋喺香港消費。

佢仲話旅發局會舉辦更多世界級盛事，爭取大型活動落戶或重返香港，依家正研究喺今年內將早前買咗嘅50萬張機票送出，而機管局亦正與航空公司研究落實向旅客送出免費機票嘅安排細節。楊又話過去3年已推出超過44.8億元支援業界，會密切留意行業人手情況，相信隨着旅遊業復甦，相關從業員亦會逐步重返崗位。