政情：18事務委會正副主席敲定首有新丁坐正

繼上周三舉行本年度首次大會，立法會18個事務委員會喺尋日選出新一年度嘅主席、副主席。最終結果出爐，其中多個委員會嘅正、副主席喺經歷一個年度嘅會議後，人選同上年度嘅變化唔大，多數舊人都喺無競爭下「冧莊」正、副主席之位。喺36個正、副主席中，大部分人同上年度一樣。但最令人注目嘅係，首次有委員會主席由議會「新丁」擔任，究竟係邊一位呢？

按慣例，往時立法會所有事務委員會主席均由舊議員出任。至今個會期，擔任事務委員會主席嘅「新丁」係議員陳祖恒，佢接替黨友吳永嘉出掌經濟發展事務委員會主席，副主席亦由同為議會「新丁」嘅蘇長荣擔任。

陳祖恒掌經濟發展事務委會

其實陳祖恒去年被委任為生產力促進局主席，於是辭去工商事務委員會副主席，結果今次「捲土重來」，仲做埋主席添。另外，福利事務委員會主席由過往僅擔任該會副主席嘅鄧家彪擔任，副主席係管浩鳴，管亦都係首次擔任副主席。

另外，唔少「新丁」議員都有新嘗試，譬如議員簡慧敏喺上年度並未出任任何事務委員會正副主席職位，今年度則為保安事務委員會副主席。亦有部分議員「轉跑道」，上年度為保安事務委員會副主席嘅黎棟國，今年轉為公務員及資助機構員工事務委員會副主席。

多名舊人連任黃英豪休息

不過，亦有議員選擇暫時「休息」。議員黃英豪為去年經濟事務委員會副主席，本年度則「兩袖清風」，無擔任任何事務委員會嘅正、副主席職位。此外，多名舊人連任主席，例如財經事務委員會同司法及法律事務委員會，分別由議員林健鋒同建制派「班長」廖長江續掌。

政制事務委員會正副主席分別由議員周浩鼎同議員李浩然連任。交通事務委員會亦出現自動當選嘅情況，其中陳恒鑌成功當選主席，而陳紹雄則自動當選連任副主席。

其實事務委員會作用都好緊要，會就特定政策範圍有關嘅事項進行商議，而喺重要立法或財政建議正式提交立法會或財務委員會前，事務委員會亦會就該等建議提供意見。