政情：跨灣大橋聚首 3前高官不忘本色

呢個組合包括前環境局局長黃錦星、公務員事務局前局長聶德權同前運輸及房屋局局長陳帆。睇佢哋以前工作嘅範疇，大纜都扯唔埋喎。點解走埋一齊呢？原來係因為慈善活動。呢個活動喺落成冇耐嘅將軍澳跨灣大橋舉辦，呢條橋有單車徑又有行人路，鍾意跑步嘅聶德權嚟都好理所當然，咁其他兩位前高官又因乜解究呢？

陳帆以前負責運輸，呢條橋喺佢任內都起好大半，所以搵佢都解得通，咁黃錦星呢？佢話呢條橋適宜市民低碳本地遊，再加上可以見到已修復堆填區上嘅「環保村」教育基地，但要留意呢個教育基地就仲未起好，預計喺今年內竣工。

佢仲乘機宣傳吓，祝願香港「及早實現碳中和」、實現「深度低碳轉型，減緩氣候變化」添！