政情：梁熙搭高鐵北上 為搶人才取經

Edward喺社交媒體貼文話搭咗高鐵返順德，講明此行係為咗「偷師」。近排大家都講「搶人才」，佢今次返鄉下就係為咗向順德取經，睇吓可以點樣「搶人才」。Edward話去咗順博創意園、廣東工業設計城同美的總部等，了解當地最新嘅發展。

睇完咁多個地方，佢話「搶人才」只係「第一步」，點留得住人才先係重點，舉例話「留住佢個人，先要留住佢個心」，提議香港企業參考當地定期舉辦單身聯誼會，務求能令員工覓得所愛，決心扎根園區，落地生根喎。

其實議員楊永杰同梁文廣都搭咗高鐵，體驗咗無票驗證嘅新措施，即係市民只需用回鄉證就可以入閘嘞！佢哋搭嗰班高鐵係去廣州東站，之後仲轉乘廣州地鐵嘅無人駕駛列車，楊永杰覺得同香港機場嘅列車差唔到，唯一唔同就係列車最前嘅玻璃可以睇到前進方向嘅情況喎。