政情：牙科治療師缺人 公務員難求診

公務員事務局回覆立法會公務員及資助機構員工事務委員會，話小學學童人數近年雖下降，但由於牙科治療師職系正值退休潮，因此人手出現短缺。截至2022年12月1日，牙科治療師職系嘅職位編制同實際人數分別係298同244，空缺率約為18%。當局話以目前嘅人手狀況，衞生署僅能勉強維持學童牙科保健服務嘅運作，唔能夠調配人手為公務員同合資格人士提供洗牙服務。

當局話會探討，安排部分合資格人士喺私營牙科診所接受洗牙服務嘅可行性；而衞生署亦喺舊年10月底邀請私營牙科診療機構提交意向書，以評估市場對提供洗牙服務嘅意向同營運服務嘅興趣，唔少私營牙科診療機構都話有興趣參與。當局話若評估後認為可行，會爭取喺今年年中以先導計劃形式進行，相信呢項措施有助紓緩因求診人士受疫情影響，需更改約期而導致大量積壓個案，同埋人手不足導致公務員同合資格人士輪候牙科福利時間過長嘅情況喎。