昔日東方政情：話安心出行值30億 邱達根嘆停用可惜
針對疫情而開發嘅應用程式「安心出行」，甫問世即被指漏洞多多，惹來唔少爭議，而隨着陸續取消防疫措施，政府喺上個月宣布停止運作，仲打算改為力推「智方便」應用程式，但有人就認為停用「安心出行」好可惜。科技創新界議員邱達根話「安心出行」係政府歷來最多人下載嘅應用程式，滲透率同商業價值都好高，反觀「智方便」嘅用戶數量遠遜「安心出行」，佢認為不如為「安心出行」加設其他功能，或更符合效益。
其實喺前日嘅立法會大會上，已經有議員批評「智方便」係「至唔方便」，事關登記同驗證好麻煩，同時關注政府會唔會將「安心出行」變成一個綜合服務平台；而邱達根就質詢當局有無嘗試更改「安心出行」嘅功能？官員嘅答覆係作為抗疫數碼平台嘅「安心出行」已完成歷史使命，停止運作係代表一個時代嘅結束，希望全港市民向前看。
可研增付費功能 掃碼泊車
邱達根尋日出席電台節目，話唔少創科公司編寫應用程式，能夠有10萬、8萬嘅下載率已經好開心，而喺香港呢個彈丸之地，「安心出行」下載次數有900幾萬，用戶多達580多萬，推算其商業價值或高達20億至30億元，能夠有咁難得嘅滲透率，若然停用就梗係可惜啦！佢話「安心出行」可增設支付功能，咁就可以喺裝設智慧門鎖嘅市政管理運動場所，門外掃碼即可完成支付費用並使用場地。至於政府嘅停車場只需張貼二維碼，同樣可做到掃碼畀錢同泊車，甚至乎唔同泊位收取唔同價錢，譬如靚嘅泊位每小時收30元，角落位收20元。佢話諸如此類嘅科技應用，「安心出行」其實大有空間。
「智方便」使用人數較少須推廣
對於政府銳意落實「一網通達」嘅全面電子化服務，邱達根話明白政府嘅立場，但佢話城市數碼化，疫情其實係一個助力。若果要只得百多萬登記用戶嘅「智方便」，普及程度同「安心出行」等量齊觀，唔係話唔得，只係又要花資源再推廣啫，即係又要再使錢，佢覺得浪費同可惜咁囉！況且「智方便」需增設全港市民必須用到嘅功能，先可以提升用戶量。
咁到底有乜嘢功能，係市民必須使用呢？咁就要由政府動動腦筋啦！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
