政情：追問食環劏房板間房多鼠患基層受驚揮刀亂斬

鼠患嚴重，陋室更甚。選委會界別議員江玉歡日前同不適切住房嘅居民會面，事後佢喺社交平台分享感受，指居住環境較佳嘅市民，實在難以想像基層人士遭受老鼠侵擾嘅可怕經歷。佢引述基層居民話即使閂咗窗，老鼠都有本事登堂入室，喺床邊走來走去，搞到夜不能寢、深宵難眠，仲有人嚇到擸起把菜刀，見鼠亂斬！

本業係律師嘅江玉歡，過去曾喺紅磡黃埔街嘅舊唐樓度過童年，每晚都會見到老鼠蹤影嘅記憶至今猶新。當日有不適切住房嘅居民同佢訴苦，話有人試過用鼠膠一晚捉咗兩隻老鼠，亦有居民試過畀老鼠咬傷肩膊！由於與鼠同眠太得人驚，有居民話試過擸起菜刀見鼠亂斬！喺不時遭受老鼠突襲嘅威脅下，不適切住房嘅居民難以好好咁休息，更有居民因此而長期睡眠質素欠佳，搞到有情緒病。

關注基層生活嘅江玉歡話唔單止老鼠，俗稱「小強」嘅蟑螂，亦係不適切住房居民經常面對嘅頭痛問題。而無論老鼠還是蟑螂嘅問題，喺市區嘅舊樓尤其常見，若果鄰近有地盤、街市或食肆，情況就更加嚴重，然而早就應該着手整治嘅蟲鼠問題，估唔到今日看似先進嘅香港仍未解決。

議員倡成立聯合滅鼠小組

其實大半年前，江玉歡都有同啲食環署衞生督察、以及滅鼠工作人士會面交流，了解鼠患問題往往係一啲唔起眼嘅城市規劃細節引致嘅，譬如路旁矮樹花槽就密布鼠洞、垃圾大膠桶底部防止污水滲出嘅設計，成為老鼠竄入垃圾桶嘅通道等，所以佢覺得鼠患問題唔止係食環署嘅責任，康文署同房屋署等部門亦需要成立聯合滅鼠小組，先可以從根本上解決日益嚴重嘅鼠患問題。

講就講咗好耐啦，不過依家政府仲未設立聯合滅鼠小組，唔知江玉歡嚟緊會點樣喺議會推動呢項工作呢？