立會變樂園 梁君彥化身導賞員

梁君彥喺社交平台貼文，話立法會平日畀人嘅感覺係嚴肅、莊嚴，但其實都有輕鬆同富有藝術色彩嘅一面，舉例話大樓內外陸續換上新裝，率先換裝嘅係專門接待活動參加者嘅公眾入口1，當參加者一踏入大樓就會睇到入口左右兩邊掛咗4幅巨型彩照，照片係用藝術視覺呈現大樓、會議廳同會議室嘅面貌，等活動參加者先嚟一個「眼球」熱身，放鬆心情，準備投入之後嘅導賞同教育活動。

尋日佢就喺公眾入口1迎接一班幼稚園學生，又形容班學生駐足觀賞照片，亦表現得好好奇，於是佢就同班學生「賣關子」，叫佢哋先記住照片顯示嘅地方，到咗參觀時就留心佢嘅介紹，咁就可以逐一搵到答案嘞！唔知班同學仔最後係咪都搵到答案呢？

其實啲裝飾係公眾入口1對出圓鼓底優化工程嘅第一階段，而第二階段嘅工程正計劃進行，目的係要提升整個圓鼓底範圍嘅採光度同美化周邊環境，佢期望完工後鼓底會更明亮、更具朝氣，為訪客帶嚟煥然一新嘅體驗。