青年儀表板手機程式 單向溝通離地 吸引青少嘥氣

喺會議上，民政及青年事務局局長麥美娟，花咗唔少口水介紹涉及《藍圖》嘅青年儀表板，同埋一站式青年資訊手機應用程式，但有關成效就遭到質疑。議員陳家珮詢問當局，有無收集青年人嘅意見同回饋，又擔心當局以「跑數咁跑」叫年輕人下載；創科界議員邱達根就認為，點樣吸引青少年使用該應用程式，係好複雜嘅事情，希望當局多聽取業界同青少年意見。而麥美娟嘅答覆，就指青年儀表板包括就業調查等多項數據，可掌握青年人嘅發展期望，而應用程式所發布嘅資訊就力求有用同有趣，以吸引青年人下載。佢強調政策公布後有一直都有好多科技公司主動聯絡當局，話可提供協助，甚至話唔收錢幫你做都得！

議員吳傑莊就提到曾參與反修例事件，但後來感到後悔嘅青年人，政府有咩方法令佢哋重新投入社會。麥美娟話唔單止係更生青年，甚至係少數族裔青年，政府都會鼓勵佢哋融入社區一齊投入建設，亦會確保每個年輕人有公平參與機會。

議員陳穎欣就關注當局會唔會制訂稱為KPI嘅績效指標，以規定學校舉辦一定時數嘅國民教育活動。當局回應話一直支援學校以不同角度推行國民教育，並會要求學校繼續完善教學質素。

議員林振昇關注青年發展藍圖會否適時更新，希望當局交出進度時間表。麥美娟回應話《藍圖》係與時俱進嘅文件，笑言可能今年好美好嘅嘢，出年已經過時，因此當局會定時更新文件及向立法會匯報。其實世界潮流成日變，青年發展都係，政府真係要跟貼啲啦。