昔日東方政情：獄中專責擦鞋 黃碧雲賺$200外快
孤獨過節呻慘 確診着保護衣放監
涉及民主派初選案獲准保釋嘅民主黨立法會前議員黃碧雲，因涉及立法會等多宗議會衝突，包括與保安衝突、搶咪發言同重複投票，早前承認違反《立法會（權力及特權）條例》被判監4星期。佢尋日刑期屆滿，可以放監喇！不過，由於佢出獄前4日「中招」，都仲要在家隔離。佢亦都喺社交平台貼文講服刑經歷，包括點樣喺唔同監獄流轉，亦話自己好孤獨咁過咗數個節日，但係都有所「得着」，究竟係咩呢？
由於疫情嚴重，黃碧雲話喺過去28日嘅服刑時間內，佢先被送往大欖監獄嘅醫院樓單人倉隔離咗8日，之後再去咗羅湖懲教所過咗冬至、平安夜、聖誕、除夕同新年。佢話呢啲節日本應同家人朋友一齊過嘅，但偏偏今次要孤獨度過。
而28日內佢共搬咗9次倉，而臨出冊前4日更加「中招」，被送咗去羅湖懲教所東翼附近嘅室內體育館隔離。佢喺尋日出獄時，被要求穿上整套保護衣離開，同埋點對點交通回家。
佢尋日朝早經快測後證實冇事，但仲要守多日隔離令。佢仲提到差啲被送去竹篙灣隔離，好彩最後可以返屋企隔離。
初選案纏身 話唔想再返「羅湖」
對於獄中嘅生活，佢形容囚友幾友善，互相照應同打氣，而佢就喺皮鞋廠工作，每周工作5日半，每日工作約4小時，專門負責擦鞋，而尋日臨離開懲教所時仲有200元薪金。佢又話休息過後，又要準備民主派初選案嘅官司，希望此生都唔使再返羅湖喎！
至於正因民主派初選案而還押嘅立法會前議員林卓廷同尹兆堅，佢哋都同2018至2020年幾宗立法會衝突有關，令到立法會會議中斷或受干擾，其中尹兆堅被判監禁7星期，林卓廷被判監3星期，而尹兆堅申請保釋等候上訴，但尹仍須就初選案還押。至於黃碧雲牽涉嘅民主派初選案，案件排期今年1月底開審。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
