政情：議員搶閘出關公幹口岸睇人流兼直播

市民等香港同內地通關足足等咗3年，到尋日香港終於同內地恢復首階段免檢疫通關，單向名額有6萬個，其中陸路口岸有5萬個名額，空、海及港珠澳大橋口岸就有1萬個。好多議員都急不及待去各個口岸同大家試試水溫，有人就要返內地公幹，有人就去口岸睇睇有幾多人，甚至做埋直播「現場直擊」、派嘢飲畀過關嘅人喎！

通關第一日，議員容海恩就喺Facebook話自己直接離開廣東省，直飛上海開會，會計界議員黃俊碩就留言叫佢「Safe trip（旅途平安）」，佢嘅「好姊妹」、民政及青年事務局局長麥美娟仲叫佢買手信添！唔單止航空，大部分議員都經陸路口岸，好似梁熙咁，佢就經深圳灣口岸去東莞濱海灣考察當地嘅創科設施，仲話朝早由深圳灣過境到內地，全程只要大約55分鐘，返港時更係「非常快捷暢順」，分別喺內地關口用6分鐘完成，喺香港關口用咗3分鐘；議員邵家輝就經名額最多嘅落馬洲口岸去深圳處理公事。

單係落馬洲口岸就有3.5萬個名額，有議員都關注到底呢個口岸人多唔多。議員劉國勳就話過關流程順暢、口岸唔算擠擁，但就覺得港鐵可以增加東鐵綫嘅班次、未來恢復羅湖口岸同蓮塘口岸嘅客運部分。

去深圳食早餐即日返港

另一議員張欣宇甚至搭乘東鐵綫首班車去落馬洲過關，同大家「現場直擊」，佢話簡單喺深圳食完早餐就折返香港啦！

都有議員用海路口岸同港珠澳大橋口岸嘅，議員楊永杰就搭金巴去珠海，發現下晝1點班次嘅金巴尚未滿座，大把位咁話喎。至於水路，就恢復咗蛇口班次，選委會界別嘅嚴剛、簡慧敏同陳月明等議員就去港澳碼頭視察，仲即場派飲品畀過關嘅人添！