政情：事務委會名單問世 3議員盡擸櫈仔

立法會2023年度會期嘅18個事務委員會成員名單出爐，其中有3位議員「去到盡」，身兼6個事務委員會嘅委員，並列榜首！其次亦有9名議員同時出任5個委員會，至於剛加入議會嘅新議員，加入最多委員會嘅係何敬康，有5個咁多。另外，委員會正、副主席選舉提名亦已展開，至下周五（13日）截止，並於本月17日首次會議上舉行選舉。

《議事規則》經修訂後不但限制委員會人數，每位議員亦最多只可以同時出任6個事務委員會。就本年度會期嘅事務委員會席位分配，立法會秘書處尋日公布結果，議員陸頌雄、謝偉銓、鄧家彪3人都出任6個事務委員會委員，其中陸頌雄加入交通、經濟發展、民政及體育、人力、資訊科技同福利事務委員會；謝偉銓就加入發展、交通、房屋、食安、環境、公務員及資助機構員工事務委員會。值得注意嘅係，原來陸、謝兩人舊年都係入咗6個委員會，而且加入嘅委員會仲要係一模一樣添！

4立會新丁得償所願

至於鄧家彪就揀咗保安、發展、交通、食安、財經同福利事務委員會，對比舊年，今年就出任埋發展事務委員會嘅成員。至於同時出任5個委員會嘅議員亦有9人，包括議員葉劉淑儀、梁美芬及梁毓偉等。

不過，有最多就自然有最少，議員林順潮就淨係出任一個、即衞生事務委員會委員。而4位議會「新丁」又如何？何敬康、尚海龍、陳永光同黃錦輝分別入咗5個、3個、3個同兩個事務委員會，而當中何敬康、尚海龍及黃錦輝3人當初係希望可以入到工商事務委員會，最終結果都係按照佢哋原本嘅諗法，睇來全部都算「得償所願」喎！

至於18個事務委員會將於本月17日舉行首次會議，選舉各事務委員會主席及副主席。各事務委員會委員可作出提名，填妥表格並於本月13日下晝5點前以電郵交回秘書處。不過早前就有指為防止有甩漏，18個事務委員會正副主席料維持不變，相信到時要選舉嘅機會都不大喇。