政情：預告3月組團當地見 印尼語梁熙只識撈麵

梁熙係社交平台貼文，話今次去泰國係「寓娛樂於工作」，事關佢到訪香港駐曼谷嘅經濟貿易辦事處，處長李湘原仲特登搵當地人同事，用泰文寫咗「新年快樂」，向港人越洋拜個早年。梁熙相信遲啲同李湘原必定會有更多時間見面，因為李兼任印尼經貿辦處長，而梁熙計劃喺3月組團去印尼，同當地嘅大企業交流，到時亦會邀請香港嘅金融機構同政府代表介紹香港，吸引當地企業來港融資上市。

佢又引述李湘原嘅說話，希望印尼團之後可以組織泰國團添！因先後會到訪呢兩個東南亞國家，梁熙話依家要跟李湘原學定泰文先，亦要學印尼話，仲Hashtag（主題標籤）話印尼話識一個，就係Indomie。呢個好多人都識喇！食埋落肚添！係印尼撈麵呀！