政情：參觀天文台有驚喜 謝小華登場報天氣

話說尋日下晝，謝小華隨同環境及生態局局長謝展寰、副局長黃淑嫻同署理氣候變化專員黃傳輝等人到訪天文台，了解部門提供嘅氣象及相關服務嘅最新發展。事後該局透過社交平台上載相片，當中可見佢哋喺天文台台長鄭楚明陪同下參觀錄影室，而謝小華就企喺綠幕前面，一嘗扮演天文台科學主任報天氣嘅滋味。睇姿勢，謝小華都似模似樣㗎，但佢報天氣有無「食螺絲」呢？咁就不得而知啦。

今次參觀過後，謝展寰指天文台嘅工作極為專業，對支援相關決策局及部門嘅工作，以及氣象領域方面嘅國際及區域合作相當重要，而天文台亦會繼續透過外展同教育活動，提升公眾對氣候變化及其影響嘅認識。