政情：點名黃之鋒齋讀稿 林琳寸反對派辯才糟

林琳談及佢當日出席聯合國人權理事會，要把握相當有限嘅發言時間，於是諗咗一個方向，就係話相信任何人去到咖啡店同人哋傾偈，能暢所欲言，唔使擔心自己會被人打，咁至係正常生活，但喺反對修訂《逃犯條例》期間嘅香港就唔得；又話嗰時香港嘅警察係畀人圍攻，而外國習慣咗警察係打人嘅，所以外國人就覺得香港警察都係同佢哋一樣，呢啲就係誤解。後來德國嘅代表同佢講，話聽完之後明白成件事嘞！

其後講到青年工作，佢話不斷搵緊啲思想端正嘅後生仔，培養佢哋去聯合國講番香港嘅實際情況，咁樣先可以提升香港嘅整體形象，仲話佢曾經同反對派辯論過，發覺佢哋只係將歪理當道理亂講一通，只係講自己嘅立場，尤其係黃之鋒。實際上，佢無論同黃之鋒喺台下或台下都曾經辯論過，必定擦出火花，仲激動到疊晒聲。佢話好明顯有人畀稿黃之鋒讀，但係偏離咗啲稿嘅內容，黃就完全唔識答。

再講到當時嘅情況，佢話若果有人覺得政府唔啱，唔代表要攞把刀去插人，呢個唔係一個道理，但當時香港人覺得呢個道理係啱，以暴易暴，咁仲攞法律嚟做乜？