政情：街坊驚恐元朗鬧市四圍衝野豬數目要管控

郊區農田亦非罕見何俊賢：日日上演

即使漁護署前年開始執行「殺豬令」，截至去年11月8日已「人道處理」278隻野豬，但依然無改野豬不時喺社區出沒嘅情況。漁農界議員何俊賢尋日喺社交平台上載一段野豬穿梭元朗鬧市嘅短片，仲話類似景象喺郊區農田幾乎每日都上演，要求政府加強管控野豬數目。

短片入面嘅野豬喺元朗大馬路四圍衝，喺行車道上「任我行」之餘仲差啲撞到人。何俊賢慨嘆話「影響民生幾可愛都無用」，指咁嘅場面喺郊區一啲都唔罕見，事關農田周不時都有野豬出沒，既影響農作物收成，間中都會出現襲擊人嘅情況，只不過好多時農民都無報警，實際情況不為大眾所得悉。

社會分歧未收窄政府有責

何俊賢認為現時政府管控野豬側重喺市區，工作做得唔夠全面。佢舉例話政府公布嘅野豬黑點都係以港島為主，鄉郊所佔嘅比例就唔多，但其實鄉郊地區都飽受野豬問題嘅困擾，管控工作其實亦相當迫切。

但一講到管控嘅方法，社會上就有好大嘅分歧，可謂「順得哥情，就失嫂意」，況且政府又出現「無目標」嘅問題。何俊賢覺得要做好野豬管控，社會宜有共識，因此政府要先做好意識形態嘅教育，做好宣傳以收窄分歧；同時要搵權威人士進行研究，睇吓香港嘅環境到底適合有幾多隻野豬，再檢視現時香港嘅野豬數量，根據研究結果去制訂管控野豬嘅政策。

另外，何俊賢提到政府目前有基金扶持本地農業，當中有5萬蚊嘅資助係供農民購買或者升級裝備，有啲農民都會用呢一筆錢嚟買防護野豬嘅設備。佢強調有基金幫農民買裝備防範野豬係好，但極其量都係治標，關鍵都係要政府做好管控野豬嘅工作。