政情：離島長命斜修葺費恐億億聲葉劉嬲爆變喊驚

早前都講過，大嶼山窩田村出入必經之路係一條喺銀礦洞旁嘅「長命斜」，村民叫苦連天，嗌咗十幾年叫政府改善，但最後係不了了之，身兼行政會議召集人嘅議員葉劉淑儀嬲爆，但相隔唔夠兩個禮拜，佢由嬲變咗驚喎。點解咁大變化？咪又係政府之過。

話說窩田村村民要求政府改善出入之路，但政府未見積極回應，土木工程拓展署最後一封回覆村長嘅信，已經係5年前嘅事，覆信嘅內容都係話工程有難度，喺上個月下旬收到村長嘅投訴，葉劉鬧爆部門不負責任，揚言會喺立法會發展事務委員會跟進呢件事。

實地視察官員隨行

相隔唔夠兩個禮拜，葉劉前日應村長嘅邀請，去視察呢條長命斜。唔知係咪發嬲有效果，同行嘅仲有土木工程拓展署可持續大嶼辦事處處長胡國源、副處長卓巧坤，同埋其工程師韓展威。嘩！認真大陣仗。

老實講，當日嘅報道出街後，唔少網民都質疑條村唔多人，若果整過條通道可能要好多錢，係咪值得呢？

葉劉前日視察時得知依家村落人口大約幾十人，亦有村民話經常居住嘅人數其實好少。佢亦話呢條村周圍嘅環境雖然優美，但係要步行一段坡度甚高嘅「長命斜」先可以到達小村落，對於長者同婦孺嚟講確實好吃力，其他村民亦慨嘆辛苦。

涉私家路或需收地

佢引述可持續大嶼辦事處工程師話，當年好彩民政署已替部分斜坡路段修葺石級，減輕居民負擔，令村民出入未至於太辛苦，但假若再削平其他斜坡路段、改變現狀嘅話，難度好高。

工程師仲解釋，一來長命斜陡峭兼坡度頗高；另一方面入村之前有幾段私家路，假如政府要做工程，當中可能牽涉收地，再加上工程費用，隨時高達一至兩億元。

聽到工程費咁高，葉劉好吃驚，話了解到開支咁大，亦明白政府動用公帑需要分優次；再加上牽涉收地，到底呢啲鄉村私家路段業權誰屬？現階段都要追查；喺各種因素下，要進行工程一啲都唔容易，所以佢會繼續同可持續大嶼辦事處積極研究，睇吓有冇其他方案，改善居民出入村落嘅苦況。

之前葉劉發咁大火，依家似乎想縮沙喎。呢啲就叫知道就吃一驚，若果政府部門早啲同村民或者同葉劉解釋，就唔會發生誤會喇！

第一手消息請下載on.cc東網 iPhone/ iPad/ Android/

爆料熱線：

(852) 3600 3600

傳真：

(852) 3600 8800

SMS：

(852) 6500 6500

電郵：

網上爆料：

MMS：

政情：離島長命斜 修葺費恐億億聲 葉劉嬲爆變喊驚