昔日東方政情：總結1年議會生涯 邱達根有得有失
光陰似箭，今屆議會眨吓眼咁就過咗一年，作為議會新丁嘅科技創新界議員邱達根(Duncan)，喺社交平台以「有得有失」嚟總結過去一年，到底佢得嘅係乜嘢呢？佢話慶幸見到政府政策有更多關於科技發展嘅章節同支援，相信依家做緊嘅嘢會對香港長遠發展有一定幫助，而未來3年任期會繼續同其他議員同事通力合作。
至於失嘅就係陪家人。Duncan話直到日前嘅聖誕同新年假期，先發覺過去一年陪伴家人嘅時間係咁多年嚟最少嘅，返屋企食晚飯變成稀客，同阿仔做功課嘅次數，兩隻手數得晒，好似對仔女唔公平。
下半年跑步目標未達成
喺上個月中，Duncan由細支持到大嘅阿根廷再奪世界盃冠軍，終於有時間與家人共度假期，發現喺出門旅遊之外，其實簡簡單單去釣吓魚、睇吓阿仔踢波、陪小朋友做功課已經係好值得珍惜嘅美好時光。
Duncan回顧去年年初為咗健康而定下目標，冀盡量喺公餘時間去跑步，每個月跑50公里以期一年總計可達到600公里；佢話上半年疫情籠罩下反而可達標，下半年則因為各種活動重啟，去到年底竟然連500公里都唔到。佢希望新嘅一年可以喺議會工作、陪伴家人、個人時間上都有更好嘅平衡。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
