政情：G18議員夥工會合組名單 事務委會人事有部署

但其實計番，合組名單前後，獲得嘅可分配名額都係一樣㗎喎，咁合組名單有咩意義呢？工聯會議員鄧家彪解釋，佢哋同G18都關注勞工、福利嘅議題，兩者合組，就可以將經濟、財經嘅委員會畀相關界別嘅議員參與，況且G18有好多專業人士，可以相輔相成咁話。

至於點解喺唔夠一周之內改名單？議員謝偉銓作為名單統籌人，指佢哋每年都要再傾是否合組，同埋傾吓名單成員參加邊個委員會嘅意向，上次交名單純粹係未傾到啫，今次傾完就交咗個合組名單啦！各個事務委員會正副主席選舉將會喺1月17號舉行，希望佢哋合組名單有用啦。