政情：重提政改急轉彎狄志遠：非合適時間

新一屆立法會任期已逾一年，又係檢視議員成績嘅時候。社福界議員狄志遠尋日發表年度工作報告，指今屆議會聲音傾斜，政治光譜唔夠多元，批評政府淨化反對聲音，強化行政主導，又指政府遲遲冇交代區議會改革嘅建議。之不過，佢參選前曾揚言上任後百日重提政改嘅承諾，但一直都未能兌現，被質疑是否走數，佢就解釋話依家唔係合適嘅時間，同埋市民對民主訴求談化咁話。

就今屆議會是否「五光十色」，狄志遠話見仁見智，但被形容為立法會「1：89」嘅佢，就指前年嘅立法會選舉投票率低，唔少泛民候選人落敗，導致議會嘅聲音傾斜，未能達至多元。至於佢話過重提政改，但至今都未見消息，佢就重申政改嘅議員議案為其重點工作，將會喺恰當時間提出，加上有朋友同佢講「唔好急就章」，畢竟現時香港市民對民主訴求淡化，提出政改需要好多條件配合。佢話目前嘅議會工作無阻力，有自主空間，亦會同建制派議員尋求合作空間，包括曾就院舍安排提出遺憾議案。

區議會改革不滿政府冇交代

談及新一屆政府推出多個藍圖，狄志遠認為部分存在疏漏。佢以區議會改革、《青年發展藍圖》為例，認為政府遲遲冇交代區議會改革嘅建議，擔心政府未來只會強化行政主導，行事自把自為，淨化反對聲音，最終只能有單一想像，未能顧及社會上嘅需要。

另外，對於大批反修例被捕人士一直未被檢控，狄志遠指年輕人參與社會運動有正當性，暴力當然有保留，但一啲輕微嘅罪行，事隔3年嘅處理仍未有明確證據，不如寬大處理，爭取年輕人對社會嘅歸屬感喎。