政情：吳傑莊拮住魚蛋 同配對學員傾談

乜嘢咁神秘？咪係帶學生囉！唓！經常有學生團參觀立法會，有乜咁出奇啫！點解話係特別任務，因為呢個指定係佢嘅學員。事關吳傑莊參加咗「共創明Teen」師友計劃，日前就約咗配對嘅學員賢仔參觀立法會，佢就做導賞員介紹立法會，講解吓議會嘅日常工作。

參觀完咁莊嚴嘅議會之後，佢哋食咗個下午茶，可能拮住魚蛋、燒賣傾偈，人都輕鬆啲，吳傑莊發現賢仔都有健談嘅一面。賢仔係考第二嘅高材生，而吳傑莊亦分享咗自己嘅讀書心得，之後仲同賢仔暢談2023年嘅大計。咁喺讀書之餘，鍾意玩乜嘢運動呢？原來賢仔鍾意打乒乓波，佢仲話下次可以同賢仔切磋吓添！