政情：無論順境逆境 林筱魯勉港人加把勁

林筱魯喺社交平台貼文話一月總會給人希望。而疫情爆發，3年過去，市民都盼望好日子蒞臨；而若果話香港嘅日子比其他地方難過，其實都要睇吓同邊啲地方比較，但點講都好，今非昔比確係事實。

睇起嚟，總似係有啲唏噓，但跟住佢話「一月還是一月；不論來年春牛圖中的牧童是穿鞋還是赤腳，大家總得挺着過，與其愁着幹、呆着等，不如笑着拚。」咦！後尾嗰幾句明顯係打氣嘅說話，咁春牛圖嘅牧童又有乜嘢意思呢？

話說春牛圖中，牧童叫芒神。芒神着鞋代表有旱災，赤腳代表雨水充足，若有水災嘅話，牧童會捲起褲管。林筱魯嘅意思即係話新一年無論係逆境同順境，大家都要笑着打拚。