政情：自動泊車系統 議員齊讚好用

陳克勤喺社交平台貼文話，自動泊車系統分幾類，有拼圖型、高塔型、圓筒型、摩天輪型、立體型及自動泊車機械人。位於白石角嘅就係香港第二個拼圖型系統，原本用地面積大概只可停泊24至28部車，轉為新系統就提供52個新型泊車位，提升約一倍嘅車位數目。佢話一定要將智慧新科技運用好，希望日後能有更多地區發展自動泊車系統停車場，紓緩香港車位不足嘅問題。

至於李世榮都話呢個泊車系統好好用，期望政府未來可以全面推行。佢提到，香港嘅停車位一向不足而車又多，有咗自動泊車系統就可以將停車位向上發展，解決土地唔夠、泊位不足嘅問題。而政府亦透露荃灣及白石角都開始用呢個系統，嚟緊深水埗都會做，未來將軍澳67區亦都計劃用呢個系統。

另外，為吸引更多人利用呢個系統，政府將臨時停車場短期合約由一年，延長到5年，始終一個車位嘅成本都要30至40萬元，一個車場嘅成本可能都要大約2,000萬元，長啲年期先可畀時間佢哋返本，吸引承辦商接手咁話。