政情：逛漁農美食嘉年華 鄭泳舜怨高佬賢大話

話說高佬賢向Vincent推介花生苗，形容外形似芽菜，用嚟打邊爐「好好食㗎」，然而檔主話花生苗已經全部售罄，所以Vincent咪話高佬賢呃鬼佢囉！即使係咁，高佬賢仍積極推介其他本地漁農產物，佢話相較於本地嘅初生蛋，其他入口雞蛋至少要遲兩個星期；儘管有時蛋殼或沾上少許雞糞，但本地初生蛋勝在夠新鮮之餘，品質亦得到認證。

後來Vincent都有大手掃貨，仲做直播介紹自己嘅「戰利品」添！之不過，當佢想講第一件貨品時，已經忘記係乜東東，惟有叫高佬賢介紹，高佬賢都隨即嘲笑佢話「你唔知又買？」原來嗰件貨品係牙帶乾，高佬賢話煮公仔麵時鍾意落兩、三片，滋味好好多咁話喎。

元朗區前區議員梁明堅都話好多產品一早就賣晒，相信係漁農美食嘉年華因疫情停辦咗兩年，加上市場對本地農產品係有一定嘅需求。之不過，本地瓜果蔬菜嘅供應仍相當充裕。佢又提到本地農業不但傾向種植高產值嘅農作物，例如羅馬生菜呢種沙律常用嘅食材，兼且走科技路線，依家連日本巨峰提子都種得出；至於粟米呢種好尋常嘅農作物，最新方法就採用盆栽種植，好處係肥料吸收夠集中、減少蟲害，遇到惡劣天氣仲可以搬入室內，避免損失。

雖然係科技種植，但梁明堅話農戶仍需投放好多心血。佢話木瓜核雖然係種子，但種植效果就未必及得用樹苗栽種，本地木瓜係一年生，果實收成後需砍樹再種，因木瓜樹易惹蟲害，否則翌年收成會減少一半。幸好一般而言，木瓜樹3、4個月就長出木瓜果實。佢話要分辨木瓜係「公」定係「乸」，其實好容易，只要長身嘅就係公，肥身就係乸。

議員郭玲麗就推介採用本地菠蘿為原料嘅鳳梨酥，話要一個新鮮菠蘿先至整到一盒，兼且不含防腐劑同埋低糖低脂，好過搭飛機去台灣買咁話。