昔日東方政情：馮家強二次感染 劉小麗浮面留言
依家日日都有萬宗確診，尋日其中一宗確診個案係佢——前香港教育專業人員協會總幹事馮家強，呢次係第二次中招嘞！好多朋友都喺網上留言問候佢，包括咗好耐都冇蒲頭、因宣誓風波被取消立法會議員資格（DQ）嘅劉小麗。
指定診所全數額滿
喺2月尾首次中招嘅馮家強，相隔10個月再中。佢喺社交平台貼文話尋日朝早快測結果係確診，話依家香港爆成咁，都預咗。佢又貪得意用醫院管理局手機程式HA Go嘗試預約指定診所或遙距診症，但全部暫時額滿。
佢憶述2月底時好多餐廳關門，買唔到外賣，雖然今次網購日用品正常好方便，唯一唔同嘅係送餐服務無端端加咗80蚊為最低消費，佢就話一個人住，點食80蚊呀？唔少朋友留言問候，而劉小麗亦話「惟有嗌定兩餐嘅嘢？」但馮嫌啲嘢食悶，劉就覆佢話「咁你要嗌間口味多元化嘅舖頭先得喇」。話時話，劉小麗喺2020年9月宣布退出工黨，同年10月就夥拍友人開口罩廠，之後就冇乜點喺公眾場合出現嘞！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
