政情：議員斥新界發展計劃唔妥 叫組團考察深圳河

話說80年代前，深圳河兩岸經常出現水浸嘅情況，為深港居民帶來不便同經濟損失。所以喺1982年4月就成立咗深港聯合治理深圳河工作小組，負責治理深圳河嘅工作。今年係小組成立嘅第40年，陳月明參觀咗渠務署舉辦嘅巡迴展覽，之後佢就話意識到其實北部都會區嘅發展係圍繞住深圳河，因為都會區打算喺港深之間由西至東興建7個陸路口岸同埋與其相連嘅交通基礎設施，所以就覺得要組織考察團去了解一下深圳河沿岸嘅地方。

同時身兼打鼓嶺區鄉事委員會主席嘅陳月明，當然好關心新界北、尤其係打鼓嶺區嘅發展喇！佢話打鼓嶺支河係駁住深圳河，所以就想令委員同其他有興趣嘅議員可以沿深圳河實地視察，亦有助了解深港口岸經濟帶嘅最新現況，佢話早前同Tony傾完之後，Tony都話「好有趣」，就叫佢寫信畀委員會申請啦！

Tony認為考察深圳河沿岸地方，就可以借鑑兩地合作嘅經驗。佢批評政府多年來對於新界發展都冇認真計劃，而成個香港都只有四分之一嘅地方係開發咗，呢個數字係遠遠低於其他地方，香港嘅住宅亦只佔全港土地嘅百分之7，所以居住環境非常密集，所以佢認為發展北部都會區係其中一個方案去改善呢啲問題，考察深圳河都可以幫助計劃點樣發展喎。

深圳河咁長，究竟要考察邊啲地方呢？陳月明話目前打算先考察深圳河喺香港境內的分段，都要同保安局嗰邊傾傾安排，但疫情始終都會完嘅，當通關等問題搞掂後，Tony就覺得如果可以安排，最好兩地都要視察啦，但本年度立法會期完結，就要等下個會期開始之後再傾嘞！