政情：寒風下踩單車 陳岳鵬凍入骨

陳岳鵬話已經着咗保暖內衣打底、外加冬季嘅單車衫、風衣外套等，唔計手袖等裝備，上身至少有4件衫；下身就着長褲禦寒，但感覺仍然係超凍！相較於低溫，強風嘅影響更大，所以大會要取消青馬大橋同汀九橋嘅路線，令到佢參加嘅50公里項目，一下子大減10多公里。佢話係有啲失望，但都體諒大會嘅決定，畢竟賽道上有某啲位置嘅側風真係好大，吹到佢左搖右擺，始終安全係最緊要咁話。

儘管無得上青馬大橋同汀九橋，但佢話日後都可以去將軍澳跨灣大橋過下單車癮，不過最好係揀清早無咁繁忙嘅時段。

講開又講，參與單車節賽事嘅佢凌晨兩點半就要起床，因為要按大會要求提早90分鐘抵達起點以核實快測同核酸檢測嘅結果。佢話摸黑出門的確有啲唔慣，惟有期望明年嘅單車節疫情告終，大家嘅作息都得以復常。