政情：返母校表演琵琶 盧偉國勸學好中國文化

話說高中時代嘅盧偉國，偶然之下睇電影《甲午風雲》，對主角北洋艦隊將領鄧世昌憂國憂民，以琵琶彈奏《十面埋伏》一幕念念不忘。後來喺中學會考之後，佢用暑期工賺取嘅工資去購買一把琵琶，之後再於報紙分類小廣告搵老師學藝。盧偉國當日冀藉住彈奏《十面埋伏》，勉勵同學要學習中國歷史，認識祖國，傳承中華文化。

講起中華文化，盧偉國憶起以前嘅小學班主任鍾老師講過，既然同學都係中國人，大家就要認真學好中文，領略中華傳統文化。鍾老師又喺課本以外嘅文言文範文補充課程，引導同學誦讀《唐詩三百首》。而盧偉國喺聖三一堂小學就讀至1965年，直到小六畢業為止。