政情：疫魔殺埋身 潘佩璆確診

潘佩璆喺社交平台貼文，指社會整體雖逐步放寬防疫，但佢個人仍然保持謹慎，以免染疫影響病人、同事。然而近日疫情升溫，即使個人如何小心，亦難以獨善其身。佢話本月17日早上做快測呈現兩條線，於是通知同事告假休息。由於家人同外傭亦都確診，於是透過視像安排家中各人接受遙距診治，然後要求親人幫手到診所攞藥。

至於佢染疫嘅病徵，就係發低燒、怕冷、肌肉痠痛同疲倦，不過翌日一覺醒來就退咗燒，疲倦同不適感亦大為消退，往後幾日除咗偶爾有幾聲咳，病情都十分輕微，家人狀況亦大致相同。佢話席捲全球嘅新冠病毒勢必同人類共存，情況將一如流行性感冒、麻疹、腮腺炎等高傳染性嘅病毒，大家要準備好面對現實咁話。